మగువ మత్తు

వెన్నెలే విస్తుబోయె వన్నెల వెలుగులన్ జూడగ
వేకువే వేగిరపడె వనిత వగలన్ వీక్షించగ

హంస నడకలు నిలిచిపోయె కన్య కదలిక కాంచగ
కోయిల కంఠం పాడదాయె మగువ మాటలాడగ

మేని గంధపు మత్తుకి మల్లె వాసన మాసెగా
నీదు నీడ తాకగ ఏటి కలువలు విచ్చెగా

అందమంతా కూడగా నీవు రూపం దాల్చెగా
అన్ని లోకముల వెదకగా మరో మగువ లేదుగా

పరుగున వచ్చితి ఆలసింపక మనసు నిన్ను కోరగా
నమ్మలేకపోతిని నీ జంటగ నన్ను నీవు పిలువగా

ఎదురు చూపె బెదురు చూపాయె మీ అన్న బయటకు రాగా
అల్లరిచేయకు మా చెల్లెని అంటూ నా పాలిట యముడే ఆయెగా!

సరసమే సంకటమాయెనని పరుగులు నే తీయగ

ఈ తుంటరి ఇక ఆమె వెంటపడడని అందరూ అనుకొంటిరిగా!